أبوى صباره
أمى دى شجرة توت
اخواتى حبة دفا
الغربه قتلانى ازاى
وانا بينهم
سامع ندا جدى
مع إنى ما عرفتوش
غير اسم فى شهاده ميلادى
كان نفسى أسأل
أى واحد عجوز
دراعى ليه انطوى
لما حاولت أطير
طلعوا عيال عارفين
ازاى يخفوا فى الهوا يعلوا
وبكام يبيعوا حلمهم ولمين
قفلت باب البورصه على حلمى
اتسعت الرؤيه لدربى ورفاقى
طوبى لمن منهم على جمرتى باقى
ياصحبة النهر
لسه كتير على الضفه
السوس نخر يا خال
ع السارى والدفه
ولا عاد شراعك علم
فى الريح يدل عليك
يا آخر الصف شدو العزم دى الرحله
لا تبتغى منتهى
ولا تنتظر مرسى
