فهرست ديوان : نعى الغلابه لبعضهم

الإهداء

عيون حبيبتى

العشق له أوراد

العشاء الأخير

فى القهوة

طرح برمهات

تاتا ورا تاتا

حكايات

دخان السجاير

للصدق كام موال

التوت بيفرش ضلته على مين؟

أيام ما كان للرحايا طحين

سفر السقوط

تنويعات عراقية

النجف

نجوم الليل

رحلة الغربة

عنب دييبو

ربيع ميدان التحرير

السوق

نعى الغلابه لبعضهم

الإهداء

الإهداء

إلى من شاركونى

معاناة الإبداع

زوجتى .. وأولادى

وبعض أصدقائى

بقلم

على عبد العزيز

عيون حبيبتى

عيون حبيبتى وساع

من الحبايب تساع

تبنى ولا بتهد

فى العشق صاحبة مهارة

لا مالكها ساكن مغارة

ولا ليه عصابه فى قصر

سابقه التاريخ والعصر

يا شهرزاد مسرور

سيفه ماهوش مسلول

إلا على عداكى

لا شافت فيكى

ضنه ولا فقير باكى

وسندبادك مسافر عشق فى الترحال

لا من دبيب العسس ولا دوشة الأهوال

العشق له أوراد

جفت حروف الوجد خوف

كملت صورتك من مداد الروح

البوح جروح .....

السر فوق الاحتمال

أنا كتفى مال ...

ياصدرى ياقفص الحديد

اوعاك تحيد ....

وتخبى آيات التمرد

جوه أذكار المريد ....

بينى وبين ضيك

يادوب حبل الوريد ..

ضيك اللى كل يوم

تلاتين ولى يتوضوا فيه

وانا ليه بصلى فروضى متيمم ؟

العشاء الأخير

أضيّق صدرى قوى

من كتر نياشينكم

استنوا يا صحابى .....

آخد نفس وارميه

يمكن ألاقى براح

لأوسمه تنيين .....

...............

طالع بكايا غنا

يشبه فى طعمه

برتقان صيفى

فصصت اشوف

إيه اللى فاضل فيه

صورة عشانا الأخير

وكلنا يهوذا

ساعة ماشبّه لنا

أنكرنا بعضينا .....

مال والمدى صلبان

ولا حد لاقى مسيح

للجلجثة يدعيه

فى القهوة

الليل زحف صفى الميدان

على قهوة نص مغمضة

فيه الرفاقة بيشربوا المر شاى ..

وبيهتكوا ستر الحكاوى الطيبة

الضحكتين بيطقطقوا قلب الحجر

ويا المعسل والكلام

القهوة متشاله وشها

اللعبه مين هايغشها ؟

غير اللى مزنوق له قشاط

الناس بتهتف للى شاط

العارضه بتحوش الهدف

اللى حدف

ماكسبش ليه خانه

الحظ كان الأصل

واللاه المسألة فيها خيانه

راحت عليك الفورة ...

كسبوك بالورق

والواد فى ايديك اتحرق

ساعة ماشاف الكومى

سلم للبنات

البصرة والطابيه المحاصرة

مابين "فيلين" تبدأ منين ؟

والرقعة ما عاد فيها ...

إلا عسكرى وحصان كسيح

طرح برمهات

فيه بيوت بتموت

على لقمة عيش

وحاجات على مص الدم تعيش

أنا جدى فى جيشكم

ما كانش شاويش

فطلعنا يدوب

حبة حرافيش

بتكلم جد

كا ابويا بيبنى

سدوده بجد

علشان لو زاد النيل عن حد

هيحوشه ليوم ما يجف البير

اسطى فى الحكمة وفى التدبير

مازرعش فى "مسرى" خضار "أمشير"

وما كانش فى يوم نبوت لغفير

ياما بات ع التور

بالنورج لما يجينا "هاتور"

فاكرينه هاتور ؟

كان يجى معاه دهب المنتور

دلوقتى السنه كلتها "بشنس"

وبتكنس كل غيطانك كنس

وفى "بابه" فتحت البوابه

دخلوها تعالب وديابه

وكلاب النبحه الكدابه

والديك الفاكر بأدانه

الصبح بيطلع علشانه

الصبح دروب يلزمه دبيب

وساعتها يطيب عنبك يا "أبيب"

ونروح ونجيب طرح "برمهات"

انطق يا سكات

مش كل مااقولك بكره

تقولى امبارح فات .....

تاتا ورا تاتا

تاتا ورا تاتا .....

ياقلبى بزيادة

العتبة خطينا

قلنا وغنينا

لك السبع حكايات

وتعلبك لو فات

هيغرق الدبه

فى النهر والا البير ؟

أنا فى الحكاية غفير ...

قبض التمن دنانير

وماجدى من فضه

الفجر يتوضا

الفرض ينقضا .... وتكمله السنه

جدى اللى كان بنّا

بنا قلعة للناصر

وسور كبير واصل

باب الفتوح بالنصر

ومزوقك يامصر

بالخان وبالأزهر

تأمل المنظر .......

************

للخيل سنابك تعغر المشربيه بغبار

مقدامين الدرج "ولسم" مع الشطار

و"سنقر الكلبى" قفلها سوق ورا سوق

عرق الجنين مسروق

و"المحتسب" بيعد ......

عدد الليمون دراويش

بيطردوا الحرافيش

ويمنعوا العامه م الخضره والجنه

وارثين مفاتحها ..

مين اللى فاتحها ؟ ....

*************

غدرك فصل يا "سليم" الجته عن راسها

زى الحسين بتقيد وتغيظ فى حراسها ......

"حسن" ياراس الغول ....

الحبل مش مفتول

ابنك "على" فى السيرك

يشبه أغا م الترك

نسوه ملاعيبه ورقّصوه ع السلك..

تفرح بها الخواجات

وتدفعلوا ألوفات

تمن اللى جايه وفات

تمن اللى جايه وفات

حكايات

امبارح فرت منى آخر دمعه

كنت حاشدها عشان معركة الحزن

بقيت عريان فى ميدان

زكل خطايا الدنيا بترجم فيا

وصوت بينادى عليا

ما عليك سوى إنك تخلع نعليك

وتولى وجهك شطر كتاب الدنيا

وتقرا

قلت ازاى ؟

لا متعلم ولا أمى

وبكيت شعرك العامى

وحبر كتابتى من دمى

ومش همى

يكون تفعيله وحداثى

مدام واصل بإحساسى

قلوب ناسى

كتير غنيت مع الصهبة

وفى الضمه

أغانى الفرح واللمه

ويوم الدرس والنورج

وختن الواد وجميزة

ورش الملح فى الغربال

ودقة زار

ومدح نبينا

ياهلالى

وذات الهمه والظاهر

وكان زهران بتمرجح فى مشنقته

وانا طالع

فى جيش أدهم

وكم أيوب صبرت معاه على البلوه

ومين أصبر سوى رحمه

ندهنى هواه وعلمنى

عديد كل الجنازات اللى حضروها

جدود جدى وأزجالهم وأمثالهم

وما ورد على لسانهم

سرق ودانى من القداس شجى الشماس

وهو بيقرا ترانيمه

وكان لسه على كفى

علامه شيخى فى الكتاب

عشان اعرف

سفينة نوح وركابها

عصا موسى وأحوالحا

وفاس محطوط

على كتف الصنم الأكبر

وهدهد جاب عشان

سليمان نبأ عاجل

وديب ظلموه بنى يعقوب

وبير فيه نور

وحوت بلع نبى وعايم

وفتيه فى كهفهم ناموا

سنين ياما

ماتعرف كام

وعبد بيخرق المركب

ويبنى جدار بلا أجره

ويقتل طفل بالحكمه

مايعرفه سوى الصابرين

على التأويل

وأنا لسه بواقى الندر

واقيدلك ياست الحزن أحزانى

دخان السجاير

دخان سيجارتك

حاصر كلام القصيدة

وفجر الحزن اللى مرمى

جوه كباية الكاكاو ....

ماتمسحيش دمعة ملاك

مرسوم على المفرش

وسايبه دمعتك

لمى حروف اتبعترت منك

واستنظرى م النهر طرح

ولا تعلنيش الانسحاب

ساعة ابتداء الفرح ....

للصدق كام موال

ماتنتظريش سفينة نوح

ما بتعديش على مدينتى

صرى الحزن فى المنديل

وسيبى دمعتين منك ..

اغنيهم نغم ما يخاف

ولا يقسّم رغيفه الحاف

مع اللى شاف ....

ولا استعصم بمواله

وباع الناى بكام فضه

حمام المركب الكداب

ما جاب وياه سوى حنضل

وشايل دم فى جناحه

يرفرف بيه على السارى

وانا حصارى

يفكه صدق موالى

التوت بيفرش ضلته على مين؟

عرق الفقير الأجير

ينبت فى الصحارى توت

هو اللى قادر يجود

بأجر رغيف وياه

يقولك اشرب ما تعرف

شاى ده والا مرار

اختار يعيش فى الضل

يزرعها خضره ببلاش

ولو نهاره ما جاش

يشق موج البحر

يرجع بالشمس فوق الكتاف

طول عمره م العيش الحرام بيخاف

لو شاف كأنه بير

يسكت ولا يقولش

مع إنه واد قويل

يفرش حصيرة الصيف

غنا ومواويل

ويدفى ليل الشتا

ويقصره بحواديت

يتلموا كل الطيبين

يقعد يقول

صلوا

على طه الرسول

فى البدء كانت

كاف ونون

وأمى بتشوى ع الكانون

شر وشبار

الرز وكلاه الملايكه

مع الصغار

نتعشا نحمد ربنا

من بعد يوم مليان شقا

جبنا الحرير م الشرنقه

المش دوده منه فيه

واللى زرعته هتلاقيه

وليه بتستنى البلح

وانت اللى علمت النخيل

فى الريح يطاطى وينجرح

وحرقت قلب التوت مرار لما رفض يشرب عكار

خلاص ما لبلابك طرح

وقتل خضار كل الفرح

أيام ما كان للرحايا طحين

ياقطر السنين اللى ماشى فى سكات

وشايل فى صدرك شوية حاجات

ملامح ابويا اللى بهته عليا

وأمى اللى راميه دموعها فى عينيا

ونبش السنين اللى يشبه لخطى

وستى اللى من فوق بخورها تخطى

تشكشك وتحرق عيون الحسود

تشوفه تكبّر .. تخمس بإيدها

ولما الليالى تضلم تقيدها

وبعد السنين امى تانى تعيدها ....

تقلدها حتى فى عقدة قورتها

فى رح الرحى ..

وعمل الرقودة

فى كل المواسم

تقولك بعودة ...

***********

ياقطر السنين اللى ماشى فى سكات

وشايل فى صدرك شوية حاجات

ده منديل بأويا .. وطاقيه لابويا ...

وقله فى صينية بطربوش نحاس

وشفشق إزاز

بتملاه مواردى

وإيه تانى عندى ؟

ده عندى كتير .....

***********

آيه قرآنيه فى مفرش حرير

وعلبه قطيفه لمصحف شريف

وشيشه قديمه كان يوم لكيف

عصايه للايامه وعكاز كفيف

كليم نوله يدوى

فيه صوره لبدوى

وراكب حصان

على الحيطه هودج

وكعبه وسفينه

ومبرور حجه يا جدى لنبينا

يا جدى ما شوفتك سوى فى حكايات ..

ياقطر السنين اللى ماشى فى سكات

وشايل فى صدرك شوية حاجات

سفر السقوط

دخل إبريل فى سبتمبر

سقط ورق الشجر كله ...

ومين منا ماوطاش

عشان يستر يدوب عورته ...

وقال يومها لسان حالهم :

محينا السبىّ يا بابل

وطاطى النخل واستسلم

ولو مريم تهزه سنين

ما عاد هيجود ...

يهوذا بيقرا فى التلمود

وبيجهز فرس أشهب

هيفتح بيه بيبان مكه

ويرسى قواعد الهيكل ...

تنويعات عراقية

(1)

قلبى

اللى انتوا عاملينه

ألبوم صور

لذكرياتكوا الحزينه

أنا ضفت له صفحتين

علمت عينى

إزاى تحبس دموعها

لما تشوف رصاصة الرحمه

وهي حاضنه

جريح الجامع المرمى

ـــــــــــــــــــــــــــــــ

(2)

أنا المحاصر

بين بدر شاكر

وأبو نواس

قررت اواصل

لعبة التمثيل

اخلع عباية عمرو

واكسر الخاتم

اللى حبسنى فيه

من ساعة التحكيم

اوعاك تصدق

إن اسحاق الموصلى

هو اللى ضاف

وتر للعود

دا البكائين لما عرفوا

إن النواح هيزيد

عملوا مساحه

للنواح أكبر

النجف

لما النجف قادت نيران

كان الإمام

من فوق سريرك يانبى

بيلم طرف البرده

يجمّع أمتك ....

تهجر سنين الخوف تشوف

مين أعد ومين جنح ؟

والى اندبح بإيدين "يزيد"

متعلقه راسه على كل المدان

إعلان معاهده مابين وبين

نبدأ بمين ؟

بحمزه والا بالحسين ؟

ناهشه الخيانه كبدنا ....

ياحزننا ...

الأقصى فين ؟

سامع أنين الصخره

اللى اتشرفت

لما ابتدا معراج نبينا منها

نفطت قلبى من الغضب

ساعة سليل العقل

أعلن حكمته

"لا تبتأس للبيت رب"

نجوم الليل

لضمين نجوم الليل

علامات فى سبحتهم

مرقصين الخيل

ع الوحده فى ساحتهم

ياقلبى ساعة الغضب

لو شفت سماحتهم

هتقول بإن الطيابه

هى ربابتهم

رحلة الغربة

أبوى صباره

أمى دى شجرة توت

اخواتى حبة دفا

الغربه قتلانى ازاى

وانا بينهم

سامع ندا جدى

مع إنى ما عرفتوش

غير اسم فى شهاده ميلادى

كان نفسى أسأل

أى واحد عجوز

دراعى ليه انطوى

لما حاولت أطير

طلعوا عيال عارفين

ازاى يخفوا فى الهوا يعلوا

وبكام يبيعوا حلمهم ولمين

قفلت باب البورصه على حلمى

اتسعت الرؤيه لدربى ورفاقى

طوبى لمن منهم على جمرتى باقى

ياصحبة النهر

لسه كتير على الضفه

السوس نخر يا خال

ع السارى والدفه

ولا عاد شراعك علم

فى الريح يدل عليك

يا آخر الصف شدو العزم دى الرحله

لا تبتغى منتهى

ولا تنتظر مرسى

عنب دييبو

قالوا العنب ع النظر

وانا نظرى على قده

سابونى وحدى هنا

وكلهم عدوا

بادفع تمن وقفتى

وهم عدوا ببلاش

فى الضلمه نجمى ارتعش

وفجر ليلى ماجاش

خايف أصدقهم لو قالوا هنجيبه

وارجع أنا وقلبى تانى لعنب ديبو

ربيع ميدان التحرير

وبامتداد الميدان

كانت الحناجر ادان

لفجر طال ليله

طالعه الجموع فى الربيع

تهتف تغنيله

العود فى وش البياده

الكعكه باقيه

وأمل

قصيده متعاده

حاضنه البلد كلها

من شبرا للجامعه

قايده عشان النجف

وكربلاء شمعه

حالفه تصلى سوا

الفجر والجمعه

قفل العسس البيبان

صهلت خيول الازهر

كنا جنود الرشيد

فى الكوفه والبصره

عشرين نهار من نور

ليه انتهوا بحسره

السيف رجع مكسور

وميت سؤال محتار

يا رب هى الهزيمه

جبر واللا انتحار ؟

السوق

اتسرسب الحلم اللى فاضل

م الإيدين العين ماعادت

تتكسف م الدمع

الجمع أصبح حاصل قسمة السمسار

أنا فى التجارة ما ليش

ما اكرهش قد الشاويش

ساعة ما يحرس غلة الباشا

الوزانين غشاش

واللا الميزان معووجه

طول عمرى حظى قليل

وانت اللى خصك ربنا

بالصدق فى التأويل

فمش كتير انك تسامحنى

لكن أمانه عليك

ما تمد نورك فى بيرى

سابنى فى وهم الونس

بعد ما فضوا السوق

نعى الغلابه لبعضهم

كان للغلابه وطن

بيرضوا بقليله

يحبوا كل اللى فيه

أرضه وسماه ونيله

يوم الحصاد يفرحوا

ويغنوا مواويله

بس اتسرق حلمهم

وطفوا قنديله

ولا حد كان جنبهم

ينعيه وينعيهم

من يومها صبحوا

الغلابه بينعوا بعضيهم